نور التوت عن حمو بيكا: كان بياخد القبض بالدولار ويدينا بالمصري (فيديو)

قال نور التوت مطرب المهرجانات إن شركة مزيكا أوضحت أن حمو بيكا هو الذي يتسلم أرباح قناة اليوتيوب، وأن علي قدورة أعتزل الغناء وقال:"فلوس الأغاني متحرمةعليا".

نور التوت: حمو بيكا عملي محضر وقالي إني أخدت منه فلوس

تحدث نور التوت في مداخلته هاتفية مع الإعلامية نهال الطايل، ببرنامج تفاصيل المذاع على قناة صدى البلد 2، قائلا:"حمو بيكا كان هو المسؤل عن  كل حاجة بتخص القناة، ومكنش بنتكلم في أي فلوس هو يقول خد الفلوس دي أخد ومبنتكلمش واحنا مبنبقاش عرفين حاجة، مكنش معاه تفويض مننا ولا أي حاجة ولا بندور وراه، لينا أكتر من 8 سنين بنشتغل بالطريقة دي، يعتبر أخويا الكبير هو اللي مربيني بعد والدي.

وتابع: مفيش أي اتفاق ولا ورقة حتى بتفويض حمو بيكا علشان يتصرف في أي حاجة، يعني أغنية زي وداع محققة 600 مليون مشاهدة أنا ليا حق فيها لأن ليا أداء صوتي فيها زي حسن شاكوش وغيره، يبقى المفروض الشركة دي لما تيجي تدي مبلغ كبير تجيب تفويض من كل الناس اللي شاركت، مش تجيب حمو بيكا بس وتديله كل الأرباح".

استطرد “التوت”: اكتشفت إن أنا باخد فتافيت مش أرباح، عرفت إن القناة بتدخل ملايين وأرباحها كثيرة جدا، القناة عاملة مليار و80 مليون مشاهدة يبقى تدخل أرباح كام؟".

واستكمل: "قناة مزيكا لما كلمناها قالت إنها متعاقدة مع حمو بيكا، مش معانا يبقى حقكنا مع حمو بيكا مش معاهم، حرام الفلوس القليلة اللي باخدها دي، الأرقام اللي أنا باخدها اتكسف أقول إن أنا باخدها".

اكمل: حمو بيكا راح عملي محضر وقالي إني خدت منه فلوس، ايه اللي يثبت إني اخدت منه فلوس، فوضته في كل حاجة كنا بنسافر نروح الدول العربية، الأجر كان بياخده بالدولار وبيديهولنا بالمصري، أنا عمري ما شوفت الدولار".

تابع: ازاي حمو بيكا مش معاه فلوس، حضرتك مش بتشوفيه على السوشيال ميديا،معرفش موضوع عربية بيكا عشان التريند ولا لأ.. ولكن أنا عمري ما هتمنى أشوفه في حاجه وحشة وبدل ما يجيب عربية بورش يجيب طيارة، ناس كتير قالتلي اعمله محضر زي ما عملك محضر، لكن أنا عمري ما أعمله محضر أبدا في حياتي، احنا متربيين مع بعض لكن هو ظلمني في حياتي كلها، اللي ياخد شقايا يبقى ظلمني".

لحن أغنية أول حياتي يا اما

تحدث نور التوت عن البلاغ المقدم ضده يتهمه بسرقة لحن أغنية أول حياتي يا اما، قائلا: أغنية أول حياتي يا اما دي أغنية أنا عاملها من بدري، كنت عاملها مع كابونجا، كنت كلمت أستاذ حسن دنيا على اللحن، إنها لو عايزني أمسح اللحن مفيش مشكلة، ولو عايز تاخد أرباح من القناة فأنا مع حضرتك خد اللي انت عايزه، لكن هو طلب أرقام كبيرة جدا فسيبت الموضوع للقضاء ياخد مجراه".

 كما كشف أنه يحضر لأغنية يجهز لطرحه في موسم عيد الأضحى المبارك، لكنه لم يستقر على اسمها حتى الآن.

يذكر أن برنامج تفاصيل برنامج اجتماعي خدمي، يعرض يومي الأحد والاثنين والأربعاء، في تمام الساعة الثامنة مساءً، على قناة صدى البلد 2 وتقدمه الإعلامية نهال طايل، ويستضيف البرنامج عدد من نجوم الفن للحديث معهم عن أعمالهم الفنية. 

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.