هل يشارك الفنانين العرب فى مهرجان "كان" لإلتقاط الصور من أجل التريند

تصدرت النجمة اللبنانية هيفاء وهبي التريند، عقب ظهورها على السجادة الحمراء لمهرجان كان السينيمائى في دورته الـ77 هذا العام، بشكل أثار تساؤلات رواد مواقع التواصل، إذ بدت الفنانة بملامح وجه قد بدت عليها علامات العمر، بسبب ظهور التجاعيد على وجهها في الصور التي تم التقاطها لها.

لكن التساؤل هنا ليس عن تجاعيد هيفاء أو فستانها، ولكن عن سبب وجود هيفاء وبعض الفنانين المصريين والعرب في مهرجان كان، رغم عدم مشاركتهم بأعمال سينمائية في المسابقات الرسمية للمهرجان السينمائي الشهير، سواء في المسابقة الرسمية أو حتى على هامش مهرجان كان السينمائي.

فلماذا يظهر الفنانين العرب في كان، رغم أن السينما العربية والمصرية بشكل خاص، غائبة ليس على الصعيد العالمى، ولكن حتى على الصعيد المصري نفسه.

إطلالات فنانات في مهرجان كان

كشف الناقد السينمائي محمود مهدي، في تصريحات خاصة لموقع الأيام المصرية، أنه من الصعب تغيير واقع فكرة أن الفنانات المصريات يذهبن إلى مهرجان كان السينمائي، للظهور على السجادة الحمراء فقط.

قائلا: صعب جدا الوضع يتغير، لأن الدايرة كلها ماشية بتكنيكس، هما من الأخر فاهمين كويس أوي إن هما لو تواجدوا في حدث زي ده بلوك أو مظهر مستفز أو لافت، هيتصوروا كتير وهيطلع منهم فيديوهات كتير، وهيترندوا وطبعا بيترندوا أكتر من أي حد تاني، ولأن وسائل الإعلام بتدفع ده اكتر من أي حاجة تانية، يعني هل مفيش مخرجين هنا لهم أعمال؟ بالعكس فيه هنا بالمهرجان اتنين مخرجين لهم أعمال، فيه فيلمين مصريين واحد وثائقي والتاني فيلم روائي، كمان فيه مهندس صوت مشارك في فيلم برازيلي، ودول ناس موجودين وأكدلك إن الناس دول كانوا ماشيين على الريد كاربت وكانوا لابسين حلو جدا، ومحدش في مصر حس بيهم أصلا".

وتابع: "لكن لو هيفاء وهبي طلعت بفستان معرفش ماله ولا معرفش مين طلعت تريند، يبقى نغير ده بأن الناس تبدأ تدرك أيه المهم وأيه اللي مش مهم، وإن وسائل الإعلام تدرك أيه هو المهم وأيه هو اللي مش مهم، وبما إن أنا وحضرتك عارفين كويس أوي إن ده مش هيحصل، فيبقى الحال كما هو عليه".

وأضاف: البقاء في مركز الاهتمام هو العملة الرئيسية، لو كل الناس اللي حواليها حسوا إنها أصبحت غير لافتة للأنظار، وأصبحت صورة مبتعملش تريند إذن بتفقد كل شيء، هي عاملة زي البطارية كده، لازم تتشحن كل شوية، وإلا وهي متسابة كده هتفضى".

محمود المهدي: خليهم يطلعوا بالفساتين أحسن

علق الناقد السينمائي على ذهاب الفنانات لحضور مهرجان كان السينمائي، دون وجود أعمال لهن في المهرجان، أو تكريم لإحدهن، مستنكرا ذهابهن إلى المهرجان دون جدوى.
قائلا: بيني وبينك بقى يعني احنا لو دفعنا الناس دي عشان تعمل أعمال تطلع في مهرجانات، يبقى لا لا خليهم يطلعوا بالفستانين أحسن، أعمال ايه بس اللي يعملوها، هي الناس دي لو عملوا أعمال هتروح مهرجانات".
تابع: " بمنتهى الصراحة دي ناس احنا عارفينهم وعارفين حدود موهبتهم عاملة إزاي".

وأضاف: طالما الناس بتتغذى على ده وهو ده الشيء الأساسي اللي هما عايزينه، هيفضل هو ده اللي هما بيسعوا له وهتفضل الدايرة بالشكل ده"، وعن طريقة حضور الفنانين فعاليات المهرجان، قال أنه يستبعد حضورهم المهرجان من قبل إدارة المهرجان، لأنهم غير مشاركين في أي مسابقة ولا بيتم تكريمهم في أي شيء.

قائلا:" لا مشاركين في أي مسابقة ولا بيتكرموا في أي حاجة، ولا جايين حتى السوق علشان يبيعوا حاجة وكلام زي كده، لكن اعتقد إن هما بيتعزموا من جهات أخرى إعلامية، لحضور الحفلات بتاعتهم والفعاليات، وطبعا فيه فعاليات كتير نابعة من جهات عربية، موجودة هنا سواء مهرجانات أو مجلات أوجهات إعلامية وغيره".

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.