«المشاكل هتضيعه».. متحدث المهن الموسيقية يكشف عن أزمات جديدة لـمسلم (خاص)
كشف الدكتور محمد عبد الله،متحدث نقابة المهن الموسيقية عن حقيقة خلافات مطرب المهرجانات مسلم مع شركات الإنتاج في الفترة الأخيرة، بعد أزمته الأخيرة بإحدى مدارس المحلة.
متحدث نقابة المهن الموسيقية يكشف عن أزمات جديدة لمطرب المهرجانات مسلم
قال متحدث نقابة المهن الموسيقية الدكتور محمد عبد الله في تصريحات خاصة لموقع الأيام المصرية، إن مطرب المهرجانات مسلم، مقدم ضده العديد من الدعاوى والشكوى للنقابة وجاري البت فيها.
وأضاف: "مسلم فيه كذا شركة رافعة عليه دعاوى، لأنه كان في شركة تبع هاني محروس، وبعد كده هاني محروس وهو تنازلوا عن العقد بكل أطرافه لمنتج سعودي اسمه سلطان الشن، وكان مدة العقد 12 سنة، وهما أثناء المدة اللي 12 سنة ساريين، راح مسلم مضى مع شركة روتانا بعدها بسنة واحدة، وبعد كده مضى مع شركة رابعة معرفش اسمها حمدي جابر أو حاجة زي كده، طب ازاي تمضي عقود مع كل دول وانت عليك إلتزامات، إزاي تمضي عقود وانت عندك عقود لسه مخلصتش".
وتابع محمد عبد الله، قائلا: كل الشركات دي هتلحقه قانونيا، مينفعش يعمل كده، وفيه شكوى كتير اتقدمت للنقابة، بصدد مسلم وقالوا إن هو كان متعاقد معانا وراح تعاقد مع شركة أخرى، واحنا أنظرنا الشركة الأخرى ورغم كده هو تعاقد برضو، فكل دول هيطالبوه بالإلتزامات والشروط والبنود اللي مكتوبة في العقد، فيه اللي هيطالبه بتعويض، وفيه اللي هيطالبه ب50% من الأعمال".
الغرامات المتوقع دفعه من قبل المطرب مسلم
وأشار "من المقرر إن الشكوى دي بتمشي في طريقين هما النقابة والمحكمة الاقتصادية، المحكمة الاقتصادية هي اللي بتأمر بالتعويضات والغرامات وفسخ العقد والفلوس اللي هتدفع وكل الحاجات دي، أما النقابة بقى بتأمر بسحب العضوية منه، أو الكارنيه يقف وهكذا، فالعضو المنتسب لا يدفع للنقابة أي غرامات ".
واختتم تصريحاته لموقع الأيام المصرية: المطرب مسلم صغير في السن، لازم يكون عنده محامي، لأن كثرة المشاكل دي هتضيعه، سنه صغير مش عارف يعني ايه عقد ويعني ايه إلتزامات، صغير فبيفتكر إنه بعد ما كتب عقد، بعد شوية يكتب عقد تاني وعقد تالت، ومتخيل الموضوع بسيط".
ونصح الدكتور محمد عبد الله، المطرب مسلم، أن يستعين باستشاري قانوني، قائلا: لازم حد يوعيه ويفهمه إن ده غلط، لازم يكون عنده محامي، يستشيره، يكون محامي دايم معاه، ياخد رأيه قبل ما يمضي أي عقد مع أي شركة، لأن الإنسان لازم يكون عنده طبيب خاص ومحامي خاص، يستشيره، فأنا بدعو كل فنان لازم يكون عنده محامي وطبيب خاص، علشان ميقعش في أي غلط".
