في ذكرى وفاته الـ 52.. صندوق أسرار الراحل "إسماعيل يس" ابن حميدو

إسماعيل يس، ملك الكوميديا في مصر والوطن العربي، أبو ضحكة جنان، اتولد وفي بقه معلقة دهب زي ما بيقولوا، زملكاوي من الدرجة الأولى، وبرغم إن أسرته كانوا تجار ذهب، الحظ ملعبش معاه لعبته للنهاية، وفاة مامته وهو صغير كانت بداية المعاناة في حياته، أبوه اتسجن بعد ما اتراكمت عليه الديون بالرغم إنه كان صائغ وكان غني، أما بقى مراة أبوه طردته وفي لحظة لقى نفسه في الشارع.

 وهتستغرب لما تعرف إن شخصيته في الحقيقة كانت حاجة تانية خالص، كان صاحب كاريزما وقدر يضحك الملايين لكنه كان جاد جدا وعصبي خصوصا وقت مباراة الزمالك، وبرغم إنه مكملش تعليمه كان مثقف جدا وكان عنده مكتبة كبيرة بـاسمه وعلم نفسه بنفسه واتقن الفرنسية والإنجليزية.. تعالوا مع بعض نفتح صندوق أسرار ابن حميدو، الكوميديان الراحل إسماعيل يس.

معاناة إسماعيل يس رغم الصغر

اتولد في السويس في 1912.. مامته ماتت وهو في سن صغير.. وبعد ما باباه اتسجن ملقاش كتف حنين يطبطب عليه.. مراة ابوه حكايتها حكاية.. قامت معاه بالواجب ومشافش منها غير القسوة.. وهتتفاجئ لما تعرف انها على تكة كانت هتسلمه للانجليز في حملتهم على مصر عشان تخلص منه.. وأخر ما زهقت وخططها فشلت طردته من البيت.. وهنا بقى اضطر يسيب المدرسة وهو لسه في الابتدائية.. عشان مكنش في حد يصرف عليه.. واشتغل في موقف عربيات في السويس.

بداية مشوار إسماعيل يس الفني

أول ما كمل 18 سنة خد قرار انه يسيب السويس ويسافر القاهرة عشان يحقق حلمه ويبقى مطرب.. بس القدر كان ليه رائي تاني.. اشتغل 9 سنين مونولوجست في فرق فنية مشهورة زي فرقة بديعة مصابني.. بعد ما رفضوه كمطرب.. اشتهر بخفة دمه وضحكته اللي مفيش زيها وحركاته العفوية.. بدأ مشواره في السينما بـ دوره في فيلم خلف الحبايب.. و كون فرقة مسرحية بـ اسمه.. قدمت أكتر من 50 مسرحية في 12 سنة.. وانطلق بأدواره في السينما لدرجة انه كان بيقدم 20 فيلم.. إسماعيل يس كان ليه دور كبير ان الشباب تدخل الجيش بسبب أفلامه في البحرية والقوات الجوية.

إسماعيل يس “تنبأ بوفاته”

عانى من المرض في أخر حياته .. لدرجة انه رفض يكمل مشواره في المسرح.. قرر يسافر الإسكندرية وقعد فيها 10 أيام قبل وفاته.. ومات بأزمة قلبية حادة في نفس اليوم اللي رجع فيه في 24 مايو 1973.. قبل ما يكمل أخر أدواره في فيلم الرغبة والضياع بطولة نور الشريف..

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.