كل ما تعطل قول إمام عاشور، تصريحات نارية من رئيس الزمالك

كل ما الدنيا تعطل هاتلها إمام عاشور ونحطه في أي جملة مفيدة واهي بتجيب مع الجمهور، ده كان رد جمهور الأهلي على تصريحات حسين لبيب رئيس الزمالك، واللي قال إنه كان ماضي مع إمام عاشور 4 عقود برقم خيالي، وإن اللاعب كان المفروض يكمل في الزمالك لفترة طويلة جدًا، لكن المجلس القديم بقيادة مرتضى منصور اعتمد عقد تاني، وده خلى إمام يمشي في وقت أسرع، وبالتالي انتقاله للأهلي.

لكن لما اتسأل لبيب عن تفاصيل العقود دي قال إنه مش هيتكلم فيها، لأنه ربما يكون فيه جديد في صفقة إمام عاشور وكأنه بيلمح لعودة اللاعب من جديد لـناديه.

وطبعا دي حاجة اغضبت جمهور الأهلي جدا، واللي بدأوا يشوفوا إن تصريحات حسين لبيب في الوقت ده عشان تشتت اللاعب أكتر قبل موقعة الترجي في نهائي أفريقيا، وكمان قالوا إنه بيعمل كده علشان يخلي اللاعب ميتعلقش أكتر بفريقه الحالي الأهلي، لكن إمام عاشور مبيديش أي اهتمام للكلام ده، واعترف بصراحة في أكتر من لقاء إن الأهلي هو ناديه، وإنه أهلاوي ومش بيفكر في أي حاجة تانية.

سبب غضب جمهور الأهلي 

تعرف ايه اللي أغضب جمهور الأهلي بجد بقى؟ 

إن الزمالك كل ما يكون عنده أزمات أو مشاكل يطلع يتكلم على إمام عاشور، وده حصل قبل كده من عمرو الجنايني والدرديري وطارق السيد وغيره من الرموز الزملكاوية، اللي من وجهة نظر جمهور الأهلي على السوشيال ميديا إنهم بيستخدموا اسم إمام عاشور في أي جملة مفيدة.

وبقوا يعلقوا: "كل ما تعطل إديها إمام عاشور". 

يا ترى إمام ممكن يرد على كل التصريحات دي، ولا سيستم الفريق اللي اتكلم عنه كهربا قبل كدة هيمنعه من أنه يرد على أي تصريحات؟

موقع الأيام المصرية، يقدم لكم تغطية شامل ومتنوعة لكافة الأخبار والأحداث المحلية والعالمية، فى شتى المجالات، السياسية، الاقتصادية، الاجتماعية، الرياضية، الفنية، ونرصد لكم الخدمات الهامة سعر الذهب، سعر الفضة، سعر اليورو، سعر الدولار، سعر الدينار الكويتي، سعر الريال السعودي.